Նախագահ Արմեն Սարգսյանը մայիսի 31-ին Սահմանադրական դատարանի դատավորի պաշտոնում առաջադրեց փաստաբան Վահե Գրիգորյանի թեկնածությունը: Առաջադրման պաշտոնական հաղորդագրության մեջ, մասնավորապես, ասված էր.«Կարևորելով իրավական համակարգի, այդ թվում՝ Սահմանադրական դատարանի գործունեության արդյունավետությունը, նկատի ունենալով, որ ՍԴ անդամի թեկնածուի ընտրության հարցը չի կարող անվերջանալի գործընթացի վերածվել, դառնալ քաղաքական սակարկությունների կամ շահարկումների առարկա, հենվելով իր և իրավական հանրույթի ներկայացուցիչների, ինչպես նաև ՍԴ դատավորի հավանական թեկնածուների հետ վերջին երկու օրերի ընթացքում ունեցած քննարկումների արդյունքների վրա, Հանրապետության նախագահը առաջարկում է Վահե Գրիգորյանի թեկնածությունը»:
Politik.am-ը թեմայի շուրջ զրուցեց ՄԱՀՀԻ փորձագետ, քաղաքագետ Արմեն Վարդանյանի հետ: Վերջինս, պատասխանելով հարցին, թե ճի՞շտ են ենթադրությունները, որ Արմեն Սարգսյանը ստիպված էր առաջադրել հենց Վահե Գրիգորյանի թեկնածությունը, և որոշակի ճնշումներ են եղել, քանի որ ԱԺ իշխող մեծամասնությունը՝ «Իմ քայլը» խմբակցությունը, այլ թեկնածուի օգտին չէր քվեարկի, ասաց.
«Միանշանակ, այդպես էլ լինելու էր՝ «Իմ քայլը» խմբակցությունը շարունակելու էր չընտրել այլ թեկնածուի՝ բացի Վահե Գրիգորյանից, բայց հստակ ասել՝ ճնշում եղե՞լ է, թե՞ ոչ, չեմ կարող, որովհետև հստակ փաստեր չկան: Երկու տարբերակներն էլ հնարավոր են: Հնարավոր է՝ ճնշում եղել է, հնարավոր է՝ նախագահ Սարգսյանը, հասկանալով իր պատասխանատվության բարձր մակարդակը, որպեսզի հաղթահարի այս խայտառակ իրավիճակը՝ մեկ տարուց ավել ՍԴ դատավորի թեկնածուի ընտրության չստացվելու, գնացել է այդ քայլին՝ պետության ու պետականության շահերից ելնելով»:
Հարցին՝ ի վերջո Հայաստանի նախագահի պաշտոնն իրո՞ք ձևական է, ինչպես շատերը պնդում են, Վարդանյանը պատասխանեց. «Սխալ է, թե նախագահը որևէ լիազորություն չունի: Նրա լիազորությունները ներկայացուցչական են, բայց որոշ պաշտոնների առաջադրմամբ սահմանադրորեն հենց նախագահն է օժտված: Նրան է վերապահված նաև երկրում սահմանադրական կարգի պահպանումը, որը ևս շատ կարևոր գործառույթ է, որով հենց նախագահի ինստիտուտը արժևորվում է»:
Քաղաքագետն ընդգծեց՝ պատահական չէ, որ նախագահին բազմաթիվ երկրներում բարձր մակարդակի ընդունելության են արժանացնում.«Օրինակ՝ նախորդ տարի հանդիպում ունեցավ ԱՄՆ պետքարտուղար Մայք Պոմպեոյի հետ, նաև՝ շատ երկրների ղեկավարներ, Հայաստան գալիս, նաև նրա հետ են հանդիպում»:
Հիշեցնենք, որ ժամանակին Վահե Գրիգորյանը Արմեն Սարգսյանի առաջադրումը նախագահի պաշտոնում համարել է ոչ լեգիտիմ․«Հայաստանի Հանրապետության քաղաքացի Սերժ Սարգսյանի՝ Հայաստանի Հանրապետության նախագահի պաշտոնի թեկնածու Արմեն Սարգսյանի վերջին վեց տարվա ընթացքում միայն Հայաստանի Հանրապետության քաղաքացի հանդիսանալու ապացույցն է, որի հիման վրա հիմա Ազգային ժողովը զբաղվելու է քաղաքական մաստուրբացիայով՝ իր և մի շարք իշխանական լեգիստների ընկալմամբ պետք է ընտրի Հանրապետության նախագահին:
․․․․Եվ այս, մեզ Ազգային ժողովի ամբիոնից հենց այս պահին քաղաքացի լինելու հարցում մեր թերացումները մատնանշող, Իտալիայի մասին հենց հիմա հեքիաթներ պատմող, տխմարագույն մի ճառ արտաբերող անգերազանցելի սույն դեմագոգը մեզ այդպես չի լուսավորի, թե այդ երբ է իր՝ բրիտանական քաղաքացիությունից հրաժարվելու մասին հայտարարությունը պետական գրանցում ստացել Միացյալ Թագավորության պետական քարտուղարի կողմից: Կներեք, որ իրական անելիքիցս մի փոքր շեղվեցի և այս չնչին և մասնավոր հարցի վրա ձեր ուշադրությունը շեղեցի: Սրանում ոչ մի անսպասելի բան չկար»,-հայտարարել էր Գրիգորյանը։
