2025 թվականի ապրիլի 1-ից հուլիսի 1-ը ընկած ժամանակահատվածում կանխատեսում է Սևանա լճի մակարդակի բարձրացում 24-29 սմ: Այս մասին այսօր՝ ապրիլի 4-ին, մամուլի ասուլիսի ժամանակ նշեց Շրջակա միջավայրի նախարարության «Հիդրոօդերեւութաբանության և մոնիթորինգի կենտրոնի» տնօրեն Լևոն Ազիզյանը՝ հավելելով, որ նման կանխատեսման համար հիմք են հանդիսացել եղանակի դիտված և կանխատեսվող պայմանները, Արփա-Սեւան թունելով վերջին տարիներին մուտք գործող ջրի միջին քանակությունը և Սևանա լճից բաց թողնվող ջրի քանակը ընդունելով 170 միլիոն քմ:
«Այդ ցուցանիշը մոտ 13 սմ-ով ցածր է անցյալ տարվա նույն ժամանակահատվածի բարձրացման ցուցանիշից: Անցյալ տարի այդ ժամանակահատվածում լճի մակարդակը բարձրացել է 42 սմ-ով։
2025 թվականի դեկտեմբերի 31-ի դրությամբ լճի մակարդակը կանխատեսվում է 1900,36-ից 1900.41 մետրի սահմաններում, որը հունվարի մեկի համեմատ կլինի -3-ից +2-ի սահմաններում»,-ասաց նա:
Անդրադառնալով ջրամբարներին, Ազիզյանն ասաց. «Դիտակվող հինգ խոշոր ջրամբարների առավելագույն լցվածությունը կանխատեսվում է Ախուրյանի ջրամբարում 100% լցվածություն, Արփենիս ջրամբարում 55-60% լցվածություն, Ապարանի ջրամբարում 45-50%, Ազատի ջրամբարում 85-90%, Մարմարիկի ջրամբարում 95-100% լցվածություն։ Ընդհանուր ջրամբարների ջրալցվածությունը նախորդ տարվա համեմատ կանխատեսվում է 15%-ից 20% քիչ»:
