Երեկ հայտնի դարձավ, որ ԵԽԽՎ Հայաստանի պատվիրակության անդամ, իշխող «Իմ քայլը» խմբակցության պատգամավոր Ռուբեն Ռուբինյանը դեմ է քվեարկել ՌԴ պատվիրակությանը ձայնի իրավունք ապահովելու համար անցկացված քվեարկության ժամանակ: Ըստ էության, ԵԽԽՎ պատմության մեջ առաջին անգամ Հայաստանի իշխանության ներկայացուցիչը դեմ է քվեարկում ՌԴ շահերից բխող նախաձեռնությանը:
Խոսակցություններ էին շրջնառվում, որ սա պատասխան է ՌԴ դեսպանի և ՀՀ երկրորդ նախագահ Ռոբերտ Քոչարյանի հանդիպմանը: Հիշեցնենք, որ նույն Ռուբինյանը հանդիպումից հետո մեծ աղմուկ բարձրացրեց, և, ըստ էության, ստիպեց նաև ԱԳՆ-ին ՌԴ դեսպանին կանչել բացատրություն տալու:
ԵԽԽՎ քվեարկությամբ էլ Ռուբինյանը փորձել է դաս տալ ռուսներին, սակայն նրա ուրախությունը բավական կարճ կյանք է ունեցել: ՌԴ-ից համապատասխան զանգը ստիպել է իշխանություններին ճանապարհ փնտրել «ջրից չոր» դուրս գալու համար:
Տագնապի մեջ հայտնված իշխանությունները կարծես «լուծում» գտել են, որի մասին իր էջում գրել է Ռուբինյանը.«Ստրասբուրգում հայկական պատվիրակության անունից ողջունեցի վեհաժողով վերադարձած ռուսական պատվիրակությանը և վերջինիս ղեկավար Պյոտր Տոլստոյին։ Ուրախ էի կրկին հանդիպել նաև ՌԴ խորհրդարանի մեր գործընկեր հանձնաժողովի նախագահ Լեոնիդ Կալաշնիկովին, որը նույնպես պատվիրակության անդամ է։
Տեղեկացնեմ նաև, որ երեկ տեղի ունեցած քվեարկության ժամանակ, իմ քվեն տեխնիկական պատճառով գրանցվել էր դեմ և ոչ թե կողմ, ինչի առնչությամբ այսօր հայտարություն արեցի ԵԽԽՎ լիագումար նիստի ժամանակ, և հայտարարությունս կցվեց նիստի արձանագրությանը։
Ի հեճուկս որոշ չարագուշակների, մեր և մեր ռուս գործընկերների միջև բացարձակապես ոչ մի խնդիր չի առաջացել, քննարկում ենք մերձեցման երեկո կազմակերպելու հարցը»,-նկատել է պատգամավորը:
Այս ամենն, իհարկե, զավեշտալի կլիներ, եթե չարվեր իշխանության վերին օղակների կողմից և հարվածի տակ չդներ պետության շահերը: Արտաքին քաղաքակաության մեջ նման «վրիպակները» անպատասխան չեն մնում, և զարմանալի չի լինի, եթե գյուղատնտեսական այս սեզոնին «վրիպակի» պատճառով մեկ շաբաթով փակվի Հայաստանը Ռուսատանին կապող միակ ցամաքային ճանապարհը՝ Լարսը:
