«ՎԵՏՕ» հասարակական շարժումը հայտարարություն է տարածել, որով շնորհակալություն է հայտնում բոլորին, ովքեր երեկ իրենց կողքին էին:
Նշենք, որ երեկ տեղի է ունեցել «ՎԵՏՕ» շարժման կին անդամների բողոքի ակցիան: Ակցիայի ընթացքում մի շարք կանայք, այդ թվում «Հայրենիքի փրկության շարժման» ղեկավար Վազգեն Մանուկյանի կինը՝ Վարդուհի Իշպխանյանը, և ՀՀ ԶՈւ ԳՇ պետի նախկին տեղակալ, ՀՀ ազգային հերոս Տիրան Խաչատրյանի կինը՝ Համեստ Երիցյանը բերման են ենթարկվել:
«Առաջին հերթին, շնորհակալ ենք մեր կոչով միացած այն խիզախ կանանց, որոնք արհամարելով թուրքական իշխանությունների կողմից կիրառվող բիրտ ուժը՝ մինչև վերջ փորձեցին ճեղքել ոստիկանական պատնեշը և դավաճանների գլխին հագցնել իրենց խորհրդանիշը՝ թուրքական ֆեսը:
Խոնարհվում ենք որդեկորույս բոլոր այն մայրերի առջև, որոնք վճռել են չլռել իրենց զավակների կորստի ցավի մասին և գնալ մինչև վերջ՝ նրանց մահվան հանգամանքներն իմանալու և ինքնազոհողությունն իմաստավորելու համար: Երեկվա մեր ակցիան նպատակ ուներ նաև այդ մայրերի սրտին մի փոքր մխիթարություն բերել, որպեսզի նրանք տեսնեն, որ միայնակ չեն իրենց վշտի ու ցավի հետ:
Շնորհակալություն մեզ աջակցություն հայտնած բոլոր փաստաբաններին, իրավապաշտպաններին, քաղաքացիներին:
Եվ վերջում՝ շնորհակալություն այն տղամարդկանց, որոնք, այնուամենայնիվ, միացել էին մեզ և փորձում էին կանխել ոստիկանների բռնի գործողությունները»,- ասված է հայտարարության մեջ:
