VIDEO. Դուք անհնարինն եք ուզում, դուք ուզում եք Ադրբեջանի կազմ վերադարձնել Ղարաբաղը, դա երբեք չի լինելու. Ս. Սարգսյանի ելույթը ԵԽԽՎ-ում

   Այսօր Եվրոպայի խորհրդի Խորհրդարանական վեհաժողովի (ԵԽԽՎ) բարձր ամբիոնից ՀՀ նախագահ Սերժ Սարգսյանը ի պատասխան ադրբեջանական պատվիրակության ղեկավար Սամեդ Սեիդովի մեղադրանքներին, թե Հայաստանը ցեղասպանություն է իրականացրել՝ հիշատակելով Խոջալուի դեպքերը, հայտարարեց՝ կարծես միտում կա Ադրբեջանում՝ անպայման ունենալ այն, ինչ-որ ունեն հայերը։ ՀՀ նախագահը նախ հորդորեց հանդարտ լինել, հանգստանալ և ապա իր խոսքերը չխեղաթյուրել. 

«Ես այս ամբիոնից չհայտարարեցի, որ ես եղել եմ պատերազմի առաջնորդ, ես այդպիսի պատիվ չեմ ունեցել, ես մասնակիցն եմ եղել Լեռնային Ղարաբաղի ժողովրդի արդար պայքարին։ Թե ինչո՞ւ ես չհիշատակեցի Խոջալուի դեպքերը, որ Դուք ցեղասպանություն եք համարում, շատ պարզ պատճառով, որովհետև այդ ցավալի իրադարձություններից անմիջապես հետո Ադրբեջանի նախագահ Այազ Մութալիբովը շատ հանգամանորեն և շատ տեղեկացված ձևով շարադրել է փաստեր և հստակ ցույց տվել, թե ովքեր են եղել այդ ջարդի կազմակերպիչները:

Ցեղասպանությունը լավ բան չէ, ցեղասպանություն տանելը դա պատիվ չէ, դա տանջանք է, և կարծում եմ, որ ինչ-որ մի միտում կա Ադրբեջանում անպայման ունենալ այն, ինչ-որ ունեն հայերը։ Գիտեք, սա անթույլատրելի մի բան է, ի՞նչի է պետք ձեզ մի բան անվանել ցեղասպանություն, որ երբեք չի եղել, և հատկապես հայերի կողմից չի եղել», — ասաց նախագահը՝ շարունակելով. — «Ինչպես երևաց Ձեր խոսքերից, դուք առավելագույնն եք ուզում, դուք անհնարինն եք ուզում, դուք ուզում եք Ադրբեջանի կազմ վերադարձնել Ղարաբաղը։ Ցավոք սրտի, այլատյացությունն Ադրբեջանում այնքան է զարգացել, որ արդեն Դուք բացահայտ հայտարարում եք, որ Ղարաբաղը ձեզ պետք է առանց հայերի, անհնար է, դա երբեք չի լինելու»։

Մանրամասները՝ տեսանյութում

 


Այս թեմայով