Վենեսուելա ուղարկված ռուսական զորքը որևէ մեկին չի սպառնում, հայտարարել է արտգործնախարարության խոսնակ Մարիա Զախարովան՝ Միացյալ Նահանգների նախագահ Դոնալդ Թրամփի հայտարարությանն ի պատասխան:
Սպիտակ տան ղեկավարը նախօրեին հորդորել էր Կրեմլին դուրս բերել իր զորքը Կարակասից՝ զգուշացնելով, որ Վաշինգտոնը կարող է ցանկացած քայլի դիմել՝ այդ նպատակին հասնելու համար:
«Մեր մասնագետները Վենեսուելա են մեկնել ռազմական ոլորտում համագործակցության մասին պայմանագրով», - ասել է Զախարովան՝ ընդգծելով, որ ռուսները Կարակասում կմնան այնքան, որքան անհրաժեշտ կլինի: Ռուսական ռազմական ինքնաթիռները՝ մոտ հարյուր զինվորների հետ, Վենեսուելա էին ժամանել այս շաբաթասկզբին՝ էլ ավելի խորացնելով երկրի ներքաղաքական ճգնաժամը:
Արևմտյան տասնյակ պետություններ, այդ թվում՝ Միացյալ նահանգները, Վենեսուելայի ժամանակավոր նախագահ են ճանաչում ընդդիմության առաջնորդ Խուան Գուայդոյին, մինչդեռ ավտորիտար կառավարմամբ հայտնի Չինաստանը, Թուրքիան և Ռուսաստանը պաշտպանում են գործող Նիկոլաս Մադուրոյին։
