Անտեսելով Եվրոպական միության հնչեցրած անուղղակի սպառնալիքները՝ Սերբիան այսօր պետք է Եվրասիական տնտեսական միության (ԵԱՏՄ) հետ ստորագրի ազատ առևտրի պայմանագիր:
Փաստաթուղթը Մոսկվայում կնքելու է վարչապետ Անա Բրնաբիչը: Դրանով կփոխարինվեն Ռուսաստանի, Բելառուսի և Ղազախստանի հետ Սերբիայի նախկինում ստորագրած ազատ առևտրի երեք առանձին պայմանագրերը:
Սերբիան չունի Հայաստանի և Ղրղըզստանի հետ ստորագրած նմանօրինակ առանձին պայմանագրեր:
Սերբիայի առևտրի նախարարությունը հայտնել է, որ այսօրվա պայմանագիրը թույլ կտա սերբական ապրանքների մոտ 95.5 տոկոսն առանց հարկման արտահանել Եվրասիական տնտեսական միության երկրներ: Սերբիայի և ԵԱՏՄ երկրների փոխադարձ առևտրի ծավալն անցյալ տարի կազմել է 3 միլիարդ 400 միլիոն դոլար:
Եվրամիության արտաքին քաղաքականության անվտանգության գերագույն հանձնակատարի գրասենյակի խոսնակ Մայա Կոչիյանչիչն ասել է, որ Բրյուսելն ուշադրությամբ հետևում է այդ զարգացումներին:
«Սերբիայի առևտրի ընդամենը 10 տոկոսն է Ռուսաստանի հետ, Սերբիայի հիմնական առևտրային գործընկերը Եվրոպական միությունն է: Սերբիայում եվրոպական ներդրումների ծավալը տասն անգամ գերազանցում է ռուսական ներդրումները», - ասել է Կոչիյանչիչը:
