Ադրբեջանի արտգործնախարարությունը հայտարարել է, թե Հայաստանը պարտավոր է Ադրբեջանի հետ բանակցել ղարաբաղյան հակամարտության կարգավորման շուրջ՝ ԵԱՀԿ Մինսկի խմբի միջնորդությամբ:
«Պարոն Փաշինյանը պետք է հստակեցնի, որ ազգայնական սադրիչների կողմից բանակցային գործընթացի վրա ճնշումները, անխոս, դատապարտված են պարտության: Այդ իսկ պատճառով նա [Փաշինյանը] այլընտրանք չունի, քան բանակցել Ադրբեջանի հետ Մինսկի խմբի միջնորդությամբ», - մասնավորապես հայտարարել է Ադրբեջանի դիվանագիտական գերատեսչությունը՝ հավելելով, թե «որքան հայաստանյան իշխանությունը արագ շարժվի այդ ուղղությամբ, այնքան արագ հայ ժողովուրդը կկարողանա կանգնել կայուն զարգացման և հարևանների հետ խաղաղության ուղու վրա»:
