Հանրային ծառայողներին բնակարանով ապահովելու համար կառավարությունը նոր ծրագիր կիրականացնի. նախագիծը կառավարության այսօրվա նիստին ներկայացրեց Քաղաքաշինության կոմիտեի նախագահի պարտականությունները կատարող Արմեն Ղուլարյանը՝ նշելով, որ բնակարանային համալիրը գտնվելու է Երևանի Արաբկիր վարչական շրջանի Ադոնցի 19/8 հասցեում։
Համալիրը բաղկացած է լինելու 619 բնակարաններից, որից միայն 345-ն են նախատեսված հանրային ծառայողների համար։
Բնակարանների բաշխման և վաճառքի գործառույթներն իրականացնելու է Քաղաքաշինության կոմիտեն, որոշման շահառու կարող են դառնալ այն անձինք, որոնք նախկինում չեն օգտվել պետական ծառայողներին մատչելի բնակարաններով ապահովելու ծրագրերից, հանդիսանում են հանրային ծառայող։
«Շահառու կարող են հանդիսանալ նաև ՀՀ-ում Արցախի մշտական ներկայացուցչության աշխատակիցները, օտարերկրյա պետությունում ՀՀ դիվանագիտական պաշտոն զբաղեցնող անձինք, ՊՈԱԿ-երի աշխատաողները՝ վարչապետի համաձայնությամբ»,-ասաց Ղուլարյանը։
Բնակարանների 1 քառակուսի մետր մակերեսի արժեքը ներքին հարդարմամբ կազմելու է 345 000 դրամ, առանց ներքին հարդարման՝ 310 000:
Ավտոկայանատեղիի արժեքը 2,5 միլիոն դրամ, բնակարանների ձեռք բերման կանխավճարը կկազմի 10 տոկոս։
Բնակարանի հավակնորդները իրենց տվյալները պետք է ուղարկեն Քաղաքաշինության կոմիտե, որից հետո կկայանա վիճակահանություն և, ըստ արդյունքների, կբաշխվեն բնակարաններն ու ավտոկայանատեղիները։
Կառուցապատողը «ՄԼ մայնինգ» ընկերությունն է։
Ղուլարյանն ասաց, որ բնակարանները նոր պետք է կառուցվեն, մոտ օրերս կսկսի շինարարությունը։