Երեկ «Ժառանգություն» կուսակցությունը հանդես եկավ ՀՀ վարչապետ Նիկոլ Փաշինյանին ուղղված բաց նամակով՝ խնդրելով վերջինիս ներկայացնել ստրասբուրգյան ելույթում հայտարարված 50 000 բացված աշխատատեղերի մասին տեղեկանք:
Politik.am-ի հետ զրույցում «Ժառանգություն» կուսակցության նախագահ Անդրանիկ Գրիգորյանն ասաց, որ իրենք սպասում են վարչապետից խնդրած տեղեկանքին, ըստ այդմ կպլանավորեն հետագա անելիքները: Մանրամասնելով իրենց կատարած ուսումնասիրությունը՝ Գրիգորյանն ասում է.
«Մեր ուսումնասիրության համար հիմք հանդիսացան փետրվար ամսվա վիճ. տվյալները, որոնցում մի քանի հակասական բաներ նկատեցինք և ի հակադարձ վարչապետի ստրասբուրգյան ելույթի՝ փորձեցինք դրանք բարձրաձայնել: Իշխանական օղակնբերը լծվել են այն տեսակետի հրապարակայնացմանը, թե այդ 50 000 աշխատատեղերը ստվերի կրճատումն են: Մենք ողջունում ենք իշխանության քայլերը՝ ուղղված ստվերի կրճատմանը, բայց երբ ուսումնասիրեցինք ՊԵԿ-ի վիճ. տվյալները, հասկացանք, որ այստեղ էլ խնդիրներ կան: Նախ՝ երկու ցուցում կա. առաջինը՝ գործազուրկների թիվը մնացել էր նույնը, երկրորդը՝ նախորդ տարվա հունվար մասվա համեմատ այս տարի տեղի է ունեցել 50 000 աշխատատեղի ավելացում: Անցած տարվա հունվարի տվյալներով՝ Հայաստանում աշխատող մարդկանց թիվը կազմել է 510 000, իսկ այս տարվա փետրվարին՝ 560 000, բայց 2018 թվականի հունվար-մայիս ամիսներին Նիկոլ Փաշինյանը որևէ լծակ չուներ և չէր կարող այն ժամանակ արձանագրված ցուցանիշները իր կառավարության օգտին օգտագործել: Մայիսի տվյալներով՝ թիվը հասել է 540 000-ի: Այսինքն՝ մենք կարող ենք արձանագրել, որ վարչապետ Փաշինյանի իշխանության օրոք՝ մայիս-փետրվար ամիսներին, Հայաստանում ավելացել է ընդամենը 20 000 աշխատատեղ: Սա որևէ աղերս չուներ Ստրասբուրիգից նրա հնչեցրած ելույթներին: Սրան զուգահեռ՝ մենք տեսնում ենք այլ Հայաստան, որտեղ աշխատատեղեր են կրճատվում խոշոր ձեռնարկություններ են սնանկանում»:
Գրիգորյանի խոսքով՝ կադրային նման ռեսուրսով պետության առջև ծառացած խնդիրները դժվար կլինի լուծել.«Կադրերը որոկյալ չեն, քաղաքականապես հասուն չեն: Հրապարակային տիրույթն անընդհատ կիքսերով է լցված: Հուսով ենք՝ առաջընթաց կգրանցվի, և պետական խնդիրների նկատմամբ նրանց մոտեցումները կփոխվեն»:
Ըստ Գրիգորյանի՝ կան ձևի ու բնույթի հետ կապված որոշակի խնդիրներ.«Ինչ է նշանակում թվերի մանիպուլացիա անել ստրասբուրգյան բարձր ամբիոնից՝ ցույց տալով, թե պետությունը սոցիալական բեռ է թեթևացնում: Նման մոտեցում ուներ Սերժ Սարգսյանը, բայց վերջինիս քաղաքական գնահատականը տվեց ժողովուրդը: Մենք պարզապես բարեկամաբար կոչ ենք անում վարչապետ Փաշինյանին հետ կանգնել ոչ մի տեղ չտանող սարգսյանական ձևի ու բնույթի խեղումներից և երկրի խնդիրների առջև մեծացնել սեփական պատասխանատվությունը»:
Ըստ «Ժառանգություն» կուսակցության նախագահի՝ երեկ ճեպազրույցներում վարչապետ Փաշինյանը մամուլի հետ շփումներում դասը վատ սովորած աշակերտի պես անընդհատ «մունաթ» էր գալիս լրագրողների վրա, թե ինչ խոստում է տվել, որ չի կատարել.«Ես պատասխանատու կերպով հայտարարում եմ՝ վարչապետ Փաշինյանը հեղափոխական հարթակից տված իր խոստումը՝ խորհրդարանական ընտրությունները անցկացնել նոր ընտրական օրենսգրքով, չի կատարել: Ես՝ որպես կուսակցության առաջնորդ, պնդում եմ, որ նա առաջնորդվել է իր կուսակցության շահերով՝ օգտագործելով հետհեղափոխական բերկրաթմբիրը սեփական քաղաքական թիմի՝ խորհրդարանում ներկայացվածության մակարդակը մեծացնելու համար»:
Գրիգորյանը նշում է նաև, որ իրականաւոմ ոչ մի բան Նիկոլով, Լևոնով կամ Րաֆֆիով պայմանավորված չէ.«Մենք ինստիտուտների ամրապնդմանն ենք կողմնակից: Կարծում ենք, որ պետք է քաղաքական մշակույթը բարելավվի, պետական կառավարման ինստիտուտները ամրացվեն»: