Արցախում ներկայացվել է Մաղավուզի հանքանյութից ստացված նավթամթերքը

«Արցախպրես»-ի թղթակցի փոխանցմամբ՝ հանրապետության նախագահի ներկայությամբ տեղի ունեցած շնորհանդեսի ժամանակ գիտական ուսումնասիրությունների ծրագրի ղեկավար, ՀԱՊՀ քիմիա-կենսա և բնապահպանական տեխնոլոգիաների ամբիոնի վարիչ Գագիկ Թորոսյանը նշել է, որ Մաղավուզի հանքի հարստացված քարածուխից լաբորատոր պայմաններում հաջողվել է ստանալ նավթամթերք.

«Ստացված ծավալները համապատասխանում են գիտական առումով սահմանված ստանդարտներին: Մասնավորապես մշակված զանգվածից, որը կազմել է մոտ 12 տոկոս, թորելով 50 %-ը, ստացել ենք դիզելային վառելիք, 30 %-ը՝ բԱրցենզին, իսկ 20 %-ը՝ բիտում: Արդյունքները ներկայացվել են նաև միջազգային գիտաժողովում և արժանացել են բարձր գնահատականի, քանի որ ի տարբերություն ընդունված պրակտիկայի, քարածխից նավթ ստանալու համար մենք նոր տեխնոլոգիա ենք կիրառել՝ ջրի փոխարեն օգտագործելով օդի ճնշման մեթոդը: Մենք հեռանկարում կարող ենք դիտարկել նաև մեկ այլ տարբերակ, այսինքն՝ կարող ենք գազաֆիկացնել ածուխը»,- ասել է Գ. Թորոսյանը:

Գիտական խմբի ղեկավարի համոզմամբ՝ հանքավայրում երկրորդ փուլի հետազոտական աշխատանքների իրականացման պարագայում, որը կտևի 3-4 ամիս, հնարավոր կլինի հստակ պարզել Մաղավուզի հանքանյութի պաշարները, քանի որ հավանականություն կա, որ այն ավելին է, քան խորհրդային շրջանում կատարված ուսումնասիրությունների արդյունքները, ըստ որի` այն կազմում է 4 մլն տոննա:

Նախագահ Սահակյանը, կարևորելով կատարված ուսումնասիրությունները, նշել է, որ անհապաղ պետք է սկսել երկրորդ փուլի աշխատանքները և պետական նախարարին հանձնարարել է բուհի հետ կնքել պայմանագիր, որպեսզի կարճ ժամանակամիջոցում գործնականում ստեղծվեն բոլոր պայմանները նավթամթերք ստանալու համար: