Անհնար է պատկերացնել արդարություն, առանց վստահելի արդարադատության․ Սուրեն Սահակյան

Անհնար է պատկերացնել արդարություն, առանց վստահելի արդարադատության ու դա ապահովող համակարգի։ Հեղափոխական գործընթացներից հետո արդարադատական համակարգի վերաբերյալ վստահության մասին փաստում են հենց արձագանքները, որոնց մասին գրել եմ սկզբում։ Այս հարցում չկա միջին վիճակ, չկա «հեղափոխական» կառավարությանը ավանսով տրված վստահության հարց, չկա «արդարադատություն չկա, ԲԱՅՑ», չկան բայցեր։ Արդարության զգացումը կամ կա, կամ այն բացակայում է և հեղափոխական իրավիճակի համար պարարտ հող կա։ Ակնհայտ է, որ արդարադատության մեր ուզած մակարդակին հասնելու համար դատավորներին չզանգելու քաղաքականությունը, որ հայտարարվեց ի սկզբանե ու, կարծես, մինչ այժմ էլ շարունակվում է, անկարող գտնվեց արդարության զգացումն ու արդարադատական համակարգի առողջացումն ապահովել։ Այն պահին, երբ քաղաքացու համբերության պաշարը, որն ամեն մեկի մոտ մի ծավալի է, սպառվեց, այ հենց այդ պահից իր համար խզվելու է կապը հեղափոխության ու գործող կառավարող ուժի միջև։ Հենց այդ պահին էլ առաջանալու է նոր հեղափոխական իրավիճակ։ Անձամբ ես, մի շատ կոնկրետ, էական հարց լուծելու համար օգտվել եմ որպես քաղաքացի ինձ ընձեռած բոլոր հնարավորություններից, կիրառել եմ ինձ հասանելի բոլոր գործիքները ԱԺ դիմելուց սկսած, իրավապահ ու դատական մարմիններով վերջացրած։ Համբերության սպառման գործընթացը հասել է վերաքննիչ դատարան, որը հետ է ուղարկել գործը՝ առկախելով արդարադատությունը։ Դրանից հետո մեկուկես քայլ է՝ վճռաբեկ դատարանն ու սահմանադրականը, եթե այն փոխվի։ Շատերի մոտ այն արդեն սպառվել է։ Շատերը դեռ կես ճանապարհին են։ Պետք է արգացնել դատական ռեֆորմները։ Երբ համբերությունը սպառվեց, այլևս ոչ մի արդարացում չի փրկի մի իրավիճակից, որը խիստ անցանկալի է։

Գրում է ՔՈ կուսակցության քարտուղար Սուրեն Սահակյանը իր ֆեյսբուքյան էջում