Թուրքիան եւ Ֆրանսիան աշխատում են հարաբերությո...

Թուրքիան եւ Ֆրանսիան աշխատում են հարաբերությունների կարգավորման ճանապարհային քարտեզի վրա, բանակցությունները լավ են ընթանում: Այս մասին հայտարարել է Թուրքիայի արտգործնախարար Մեւլութ Չավուշօղլուն՝ հավելելով, որ Անկարան պատրաստ է բարելավել հարաբերությունները ՆԱՏՕ-ի իր դաշնակցի հետ, եթե Փարիզը ցուցաբերի նույնպիսի պատրաստակամություն, հաղորդում է Reuters-ը:

Նրա խոսքով՝ ՆԱՏՕ-ում դաշնակիցների ներկայիս լարվածությունն առաջացել է այն պատճառով, որ Փարիզը «կտրուկ» է հանդես գալիս Թուրքիայի դեմ՝ 2019-ին հյուսիսարեւելյան Սիրիա Անկարայի ներխուժումից հետո: «Թուրքիան կտրականապես դեմ չէ Ֆրանսիային, բայց Ֆրանսիան կտրականապես դեմ է Թուրքիային «Խաղաղության գարուն» գործողությունից հետո»,- ասել է Չավուշօղլուն: «Ի վերջո, մենք շատ կառուցողական հեռախոսազրույց ունեցանք իմ ֆրանսիացի գործընկեր Ժան-Իվ Լե Դրիանի հետ եւ պայմանավորվեցինք, որ պետք է մշակենք հարաբերությունների կարգավորման ճանապարհային քարտեզ»,- ասել է նա: «Մենք հարաբերությունների կարգավորման գործողությունների ծրագրի կամ ճանապարհային քարտեզի վրա ենք աշխատում, եւ ամեն ինչ լավ է ընթանում... Եթե Ֆրանսիան անկեղծ է, Թուրքիան պատրաստ է կարգավորել հարաբերությունները նաեւ Ֆրանսիայի հետ»: