ԱՄՆ-ում ՀՀ դեսպան Լիլիթ Մակունցը երեկ՝ սեպտեմբերի 21–ին, հեռավար հանդիպում է ունեցել Կոնգրեսի «House Democracy Partnership» հանձնաժողովի նախագահ կոնգրեսական Դեյվիդ Փրայսի հետ։
Դեսպանն իր երախտագիտությունն է հայտնել կոնգրեսականին` ՀՀ Ազգային ժողովի եւ ԱՄՆ Կոնգրեսի միջեւ համագործակցության ընդլայնման եւ խորացմանն ուղղված ջանքերի համար:
Դեսպանը ներկայացրել է Հայաստանի կառավարության կողմից իրականացվող ժողովրդավարական բարեփոխումների օրակարգը եւ այդ առումով կարեւորել Միացյալ Նահանգների կողմից ցուցաբերվող աջակցությունը:
Դեսպան Մակունցը մանրամասն ներկայացրել է Արցախի շուրջ ստեղծված իրավիճակը եւ 44-օրյա պատերազմին հետեւած հումանիտար ճգնաժամը: Զրուցակիցները կարեւորել են ԵԱՀԿ Մինսկի խմբի համանախագահության հովանու ներքո ղարաբաղյան հակամարտության խաղաղ կարգավորման անհրաժեշտությունը:
