ԼՀԿ-ական պատգամավորը կառաջարկի միավորել երեք...

«Լուսավոր Հայաստան» խմբակցության պատգամավոր Աննա Կոստանյանը առաջարկելու է միավորել երեք կինոկառույցները՝ Ազգային կինոկենտրոնը, «Հայք» փաստավավերագրական ֆիլմերի կինոստուդիան և «Հայֆիլմ» կինոստուդիան: «Արմենպրես»-ի հաղորդմամբ՝ Կոստանյանն այս մասին հայտնեց խորհրդարանում Կինեմատոգրաֆիայի մասին և կից ներկայացված օրենքների նախագծերի փաթեթի քննարկմանը:

«Այս օրենքի հնարավոր ընդունումից հետո առաջարկ եմ անելու, որ այս պահին Հայաստանում գոյություն ունեցող երեք կինոկառույցները՝ Ազգային կինոկենտրոնը, «Հայք» փաստավավերագրական ֆիլմերի կինոստուդիան և «Հայֆիլմ» կինոստուդիան Կառավարության որոշմամբ միավորվեն, լինի այն ազգային մարմինը, որի մասին խոսում ենք տվյալ օրենսդրական կարգավորման մեջ: Եվ այդ երեք կառույցների պետական ֆինանսական միջոցների համատեղումից հնարավորություն ունենանք ֆիլմարտադրությունը զարգացնելու»,-ասաց Կոստանյանը:

ԲՀԿ-ից Միքայել Մելքումյանը հետաքրքրվեց, թե Կինեմատոգրաֆիայի մասին ներկայացված օրենքը կարո՞ղ է արդյոք օգնել ներգրավել մեծ ներդրումներ այդ ոլորտում:

Կոստանյանը պատասխանեց՝ այս օրենքով փորձում են համակարգել, օրենքների այնպիսի կարգավորման հասնել, որ նաև օտարերկրյա կազմակերպությունները, որ Հայաստան պետք է գան ֆիլմարտադրության նպատակով, կարողանան հստակ մեկ աղբյուրից իմանալ, թե պետությունն ինչ երաշխիքներ է սահմանում իրենց համար: