Հաճախ ենք հաղթանակներ կռել պարտադրված ճակատամարտում. Գալուստ Սահակյանի ուղերձը

գալուստԱԺ նախագահ Գալուստ Սահակյանն ուղերձ է հղել Հանրապետության տոնի առթիվ, որում ասվում է.

«Սիրելի՛ հայրենակիցներ, շնորհավորում եմ Հանրապետության տոնի առթիվ:
Պետականության երազանքը մեր գիտակցության մեջ մշտապես ունենալով` պետություն ունենալու քիչ հնարավորություններ ենք ունեցել: Ավելի քան 95 տարի առաջ իրացնելով դրանցից մեկը` հռչակեցինք Հայաստանի առաջին հանրապետությունը:

 

Ընդամենը հաշված տարիներ էին անցել Հայոց ցեղասպանությունից, և Սարդարապատում, Բաշ Ապարանում, Ղարաքիլիսայում տարած հաղթանակներն առաջին միասնական հուժկու պատասխանն էին ցեղասպանության հանցագործությանն ու դրա հեղինակներին, իսկ հայկական անկախ պետության ստեղծումը վկայությունն էր այն բանի, որ անգամ ամենաողբերգական հարվածից մեր ժողովրդի ոգին ու կենսունակությունը ոչ միայն չեն պակասում, այլև բազմապատկվում են:
Ցեղասպանության 100-րդ տարելիցի տարում ավելի խորհրդանշական են դառնում և 1918թ. Մայիսի 28-ի հաղթանակները, և իբրև դրանց արդյունք՝ Հայաստանի առաջին հանրապետության հռչակումը: Մեր պատմության ընթացքում հաճախ ենք հաղթանակներ կռել պարտադրված ճակատամարտում՝ ինքնապահպանության թելադրանքից ելնելով: 20-րդ դարասկզբին Սարդարապատում հաղթեցինք գոյապայքարում, միասնական ուժով և արժանապատվորեն: 20-րդ դարավերջին Արցախյան ազատամարտում հաղթեցինք վերստին համաժողովրդական ջանքերով և նվիրումով:

 

Հաղթանակներ կռած և հաղթանակների ձգտող սերունդները ապրում են որպես հաղթանակների հիշողությունը վառ պահող և միաժամանակ հաղթանակներ տարած մեկ միասնական ժողովուրդ` ապագայի հաստատուն տեսլականով:
Կրկին շնորհավորելով Հանրապետության տոնի առթիվ` մաղթում եմ բոլորիս խաղաղություն, բարեկեցություն, լավատեսություն և նոր հաղթանակներ»:

Դիտվել է 10 անգամ
 


Այս թեմայով