Տեղի են ունեցել ԱՊՀ ՄԽՎ մշտական հանձնաժողովների նիստերը

Տեղի են ունեցել ԱՊՀ ՄԽՎ մշտական հանձնաժողովների նիստերըՄայիսի 13-15-ը Սանկտ Պետերբուրգում տեղի են ունեցել Անկախ պետությունների համագործակցության մասնակից պետությունների միջխորհրդարանական վեհաժողովի մշտական հանձնաժողովների նիստերը:

Պետական շինարարության եւ տեղական ինքնակառավարման փորձի ուսումնասիրման մշտական հանձնաժողովի նիստի աշխատանքներին մասնակցել են ՀՀ ԱԺ տարածքային կառավարման եւ տեղական ինքնակառավարման հարցերի մշտական հանձնաժողովի փոխնախագահ Արաիկ Հովհաննիսյանը եւ ԱԺ պատգամավոր Արմեն Ավետիսյանը:

Խորհրդարանականներն ու փորձագետները քննարկել են տարածքային կառավարման եւ տեղական ինքնակառավարման ոլորտի մոդելային օրենքների նախագծեր: Հանձնաժողովի անդամներին ներկայացվել է տեղեկատվություն ԱՊՀ անդամ պետությունների միջտարածաշրջանային համագործակցության կոնվենցիայի նախագծի, անդամ պետությունների տարածաշրջանների համաժողովի նախապատրաստման ընթացքի վերաբերյալ, ինչպես նաեւ՝ ԱՊՀ ՄԽՎ անդամ պետությունների կայուն եւ անվտանգ զարգացման կոնվենցիայի նախագծի ու անդամ պետությունների կայուն եւ անվտանգ զարգացման օրենսդրական հիմքերի հայեցակարգի նախագիծը: Նիստի մասնակիցներին ներկայացվել է տեղեկատվություն 2014 թ. ընթացքում հանձնաժողովի աշխատանքի արդյունքների, ԱՊՀ անդամ պետությունների 2011-2015թթ. մոդելային օրենսդրության հեռանկարային ծրագրի եւ 2016-2020 թթ. մոդելային օրենսդրության հեռանկարային ծրագրի առաջարկների վերաբերյալ:

Էկոնոմիկայի եւ ֆինանսների մշտական հանձնաժողովի նիստին մասնակցել է ԲՀԿ խմբակցության քարտուղար Վահե Էնֆիաջյանը: Նիստի ընթացքում վերանայվել են «Հանրային-մասնավոր գործընկերության մասին» մոդելային օրենքի նախագիծը, Հարկային օրենսգիրքը, «Հավատարմագրման համապատասխանության գնահատման» մոդելային օրենքը, հետախուզման եւ տիեզերական տարածությունը խաղաղ նպատակներով օգտագործելու ոլորտներում ԱՊՀ անդամ պետությունների միջեւ համագործակցությանը վերաբերող կոնվենցիաները: Քննարկվել են նաեւ մոդելային օրենքներ, ինչպես նաեւ հանձնաժողովի աշխատանքային գործունեությանը վերաբերող այլ հարցեր:

Որոշվել է հանձնաժողովի հաջորդ նիստն անցկացնել հոկտեմբեր կամ նոյեմբեր ամիսներին:

Հայկական պատվիրակության անդամները հանձնաժողովների նիստերում հանդես են եկել հարցադրումներով, ներկայացրել մի շարք առաջարկներ:

Նշենք, որ հանձնաժողովների նիստերին մասնակցել է նաեւ ԱՊՀ ՄԽՎ խորհրդի գլխավոր քարտուղարի տեղակալ, ԱՊՀ ՄԽՎ-ում ՀՀ ԱԺ ներկայացուցիչ Հայկ Չիլինգարյանը:

Այցի շրջանակում հանձնաժողովների անդամները եղել են Սանկտ Պետերբուրգի Կրոնշտադտ շրջանում, ուր հանդիպել են համայնքային խորհրդի ներկայացուցիչների հետ եւ ծանոթացել Կրոնշտադտի տեղական ինքնակառավարման մոդելի առանձնահատկություններին:

 


Այս թեմայով