«168 ժամ». Զարուհի Փոստանջյանը՝ Լեւոն Զուրաբյանին. Այ Լյովիկ, էլի թռար

7229Երեկ ԱԺ նախագահ Հովիկ Աբրահամյանի սենյակում լեզվակռվի են բռնվել խորհրդարանական երկու ընդդիմադիր խմբակցությունների ղեկավարներ` Լեւոն Զուրաբյանը եւ Զարուհի Փոստանջյանը: Այս մասին գրում է «168 ժամը» եւ հավելում. «Հովիկ Աբրահամյանն իր մոտ է հրավիրել խմբակցությունների ղեկավարներին, որպեսզի նրանց հայտնի միջազգային խորհրդարանական կազմակերպություններում հայաստանյան պատվիրակությունների կազմավորման կարգի փոփոխությունը, որի արդյունքում` «Ժառանգություն» խմբակցությունը զրկվել է ԵԽ ԽՎ-ում իր ունեցած տեղից:
Այսինքն՝ Հովիկ Աբրահամյանը կատարել է մի փոփոխություն, որի նպատակը եղել է Զարուհի Փոստանջյանին ԵԽ ԽՎ պատվիրակության կազմից հանելը: Զ. Փոստանջյանին զայրացրել է այն հանգամանքը, որ ՀԱԿ խմբակցության ղեկավար Լեւոն Զուրաբյանը որեւէ դիրքորոշում չի արտահայտել այդ առնչությամբ, եւ, որ Հովիկ Աբրահամյանի որոշումը չի որակել` որպես ընդդիմության նկատմամբ խտրականության դրսեւորում:

«Այ Լյովիկ, էլի թռար: Ոնց որ Եվրախորհրդի նիստի ժամանակ հատուկ ուշ գրանցվեցիր, որ Սերժ Սարգսյանին հարց չտաս, հիմա էլ այստեղ ես թռնում, որ հանկարծ իշխանությունների հետ հարաբերություններդ չվատացնես»,- մոտավորապես այսպես է ՀԱԿ խմբակցության ղեկավարի հետ խոսել «Ժառանգություն» խմբակցության նորընծա ղեկավար Զ. Փոստանջյանը:

Լեւոն Զուրաբյանը բովանդակային բանավեճի մեջ չի մտել Փոստանջյանի հետ՝ ասելով, որ ինքը «Լյովիկ չէ, այլ Լեւոն Զուրաբյան» եւ խորհուրդ տվել, որ Փոստանջյանն իրեն կոռեկտ պահի:

Այսպիսով, Հայաստանի ընդդիմադիր դաշտում շարունակվում է պայքարը թիվ մեկ, կամ «իրական» ընդդիմության տեղի համար: Այդ պայքարում Զ. Փոստանջյանը միայնակ է` ընդդեմ մի փոքր ավելի բազմամարդ ՀԱԿ խմբակցության: Բայց չնայած ուժերի անհավասարությանը, Փոստանջյանը կարողանում է ավելի «արմատական եւ ծայրահեղ ընդդիմադիր» երեւալ, քան ՀԱԿ ներկայացուցիչները: Նրանք կարող են ասել, որ Զ. Փոստանջյանն իրեն դուրս է դրել Էթիկայի բոլոր նորմերից եւ անում է քայլեր, որոնք հակասում են տարրական բանականությանը:

Երեկ խորհրդարանում տեղի ունեցածը հերթական անգամ ցույց է տալիս ընդդիմադիր դաշտի սնանկությունը: 2012 թվականին «իշխանությունների դեմ պայքարի» կարգախոսներով խորհրդարան մտած ընդդիմադիր ուժերն արդեն մեկուկես տարի իշխանության դեմ պայքարելու փոխարեն` զբաղված են բացառապես իրենց խմբակցությունների ներսում հարաբերություններ պարզելով, իրար դեմ կատաղի պայքար մղելով»,- գրում է «168 ժամը» (Մանրամասները՝ թերթի այսօրվա համարում):

 

Դիտվել է 63 անգամ
 


Այս թեմայով