Home » ՆԵՐՔԻՆ ԿՅԱՆՔ » Ուզում ենք աշխարհ շուռ տալ, կստացվի, թե ոչ՝ ժամանակը ցույց կտա. Կարեն Կարապետյան

Ուզում ենք աշխարհ շուռ տալ, կստացվի, թե ոչ՝ ժամանակը ցույց կտա. Կարեն Կարապետյան

Կարեն ԿարապետյանԱյո, ուզում ենք աշխարհ շուռ տալ, կստացվի, թե ոչ՝ ժամանակը ցույց կտա. Արցախի Տիգրանակերտ բերդ-ամրոցում տված մամուլի ասուլիսին ասաց Հայաստանի վարչապետ Կարեն Կարապետյանը՝ անդրադառնալով ՏՏ ոլորտի ներկայացուցիչների հետ հանդիպման իր հայտարարությանը:

«Ինչո՞ւ հենց տեղեկատվական տեխնոլոգիաների ոլորտը, որովհետև արդյունավետությունը շատ է, կտրուկ փոփոխություն անելու շանսը՝ մեծ»,- ասաց նա:

Վարչապետն օրինակ բերեց, թե գյուղատնտեսության ոլորտի համար երկար ու ծանր աշխատանք պետք է անեն և իհարկե գիտեն, որ գյուղատնտեսությունը ՀՆԱ-ի մեջ մեծ աճ ու կտրուկ փոփոխություն չի կարող տալ: «Իսկ ո՞ր ոլորտն է, որ կարող է ֆիշկա լինել, կտրուկ աճ տա՞լ, ոլորտներից մեկը դա է»,- ասաց նա:
ՏՏ ոլորտի ներկայացուցիչների հետ, ըստ Կարապետյանի, իրենց խոսակցությունն անավարտ մնաց և նա տեղեկացրեց, որ պայմանավորվել են երեքշաբթի ևս հանդիպել:

«Բիզնեսն ասում է, իրեն ինչ է պետք, որ ինքը հեղափոխություն անի, ինչ է ակնկալում, մենք էլ ասում ենք մեր ուժը, կարողությունները թույլ են տալիս, թե՝ չէ: Իրականում մենք շատ համարձակ առաջարկություն ենք արել, կադրերը կան, հիմա մենք պետք է հասկանանք, թե ինչպես կադրերի հետ համատեղ կառավարենք, ընդ որում՝ մենք պատրաստ ենք համատեղ կառավարել»,- ասաց նա:

Կարեն Կարապետյանը, ի դեպ, նկատեց, թե իր այդ աշխարհը շուռ տալու մասին խոսքերից հետո հիմա էլ կասեն, թե՝ «բա՞ չասեցիր աշխարհ ենք շուռ տալու, բա ո՞ւր ա շուռ չտվեցիր»: «Այդ իսկ պատճառով այդ հարցով ասեմ, ինչ է եղել, ուզո՞ւմ եմ աշխարհ շուռ տալ՝ հա, բայց խոսքը ՏՏ ոլորտի մասին է, որովհետև մեծ ներուժ ունի, բայց հանգիստ նստել է, գնում է առաջ: Հիմա այդ ոլորտը կարող է թափ ստանալ, և փորձում ենք մեկս մյուսին բզելով առաջ տանել»,- ասաց նա:

Կարեն Կարապետյանը ծանոթացել է ներկայացված ծրագրերին, դեռ գոհ չէ: «Նշել եմ, որ հետաքրքիր են, բայց ինձ այս ոլորտի համար նման ծրագրեր չեն պետք: Մենք պայմանավորվել էինք, որ պետք է բերեն և ասեն, թե ինչ քայլեր ենք անում, որ ոլորտը փոխվի»,- ասաց նա:

Untitled-1 copy - Copy - Copy