Տիմատին եկել է «Դերժավայի Արկադի» դստեր հարսանիքին երգելու

«Հրապարակ» թերթը գրում է. «Երեկ՝ հունիսի 7-ին, ԱԺ ՀՀԿ-ական պատգամավոր Արկադի Համբարձումյանի՝ Դերժավայի Արկադի կրտսեր դստեր՝ Սվետայի հարսանիքն էր։ Նա նախորդ տարի նշանվել էր եղբոր համադասարանցու՝ աղմկահարույց պատմություններով հայտնի Ռուբեն Սիմոնյանի՝ «Բոգո» մականունով հեղինակության որդու՝ Հովիկի հետ, որը նաև Սամվել Ալեքսանյանի մտերիմն է:

Հարսանիքը կայացել է Գագիկ Ծառուկյանի «Փարավոն» ռեստորանում, նորապսակների քավորն էլ օլիգարխ Սամվել Ալեքսանյանն է: Հարսանիքին երգել է մի ամբողջ աստղաբույլ, անգամ ռեփեր Տիմատին, ով այսօր պետք է Հանրապետության հրապարակում անվճար համերգով հանդես գա։ Նա մեկ օր շուտ է ժամանել՝ հատուկ այդ հարսանիքին երգելու համար: Ռեփերը մի քանի երգ է կատարելու:

Հիշեցնենք, որ մայիսի 12-ին ևս Տիմատին ժամանել էր Երևան, սակայն բեմ չէր բարձրացել, ելույթ էին ունեցել միայն Քրիստինա Սին, Մոտը և L՛One-ը։ Կազմակերպիչները պատճառաբանել էին, թե համերգի ընթացքում տեխնիկական խնդիրներ էին առաջացել։ Եվ հիմա, որպես փոխհատուցում, կազմակերպվել է բացօթյա անվճար համերգ Հանրապետության հրապարակում։

Երեկ երգչուհի Սոնա Շահգելդյանը ֆեյսբուքյան իր էջում անդրադարձել էր Տիմատիի՝ Հայաստանում կայանալիք համերգին ու գրել․ «Ոնց որ այն ժամանակ էլ էր հարսանիք երգել, չի եկել համերգի, մի հատ թող լավ հիշի: Անկապ տեղը ասել են` տեխնիկայից է, ո՞նց է, որ մյուսները երգել են… Մեր ազգը սիրում ա ուրիշներին մեծարի, առաջին հերթին ձերին գնահատեք, սիրեք։ Լիքը լավ երգողներ կան, որ էսօր կարիք ունեն շատ բաների, ու շատ հարցեր կան, որ պետք է լուծվի»։

Առավել մանրամասն՝ թերթի այսօրվա համարում:

Դիտվել է 273 անգամ
 


Այս թեմայով