Հոկտեմբերի 14-ին՝ Մոսկվայի ժամանակով առավոտյան ժամը 4:30-ի սահմաններում, Հյուսիսային Օսեթիայիում` Բեսլան քաղաքից 6 կիլոմետր հեռավորության վրա, վթարի է ենթարկվել ոչ կանոնավոր ուղևորափոխադրում իրականացնող Մոսկվա-Երևան ավտոբուսը:
Հայաստանի տրանսպորտի, կապի և տեղեկատվական տեխնոլոգիաների նախարարության լրատվական ծառայության փոխանցմամբ, նախնական տվյալներով` վթարի հետևանքով կա 5 զոհ, 27 վիրավոր:
Այս պահին վթարի վայրում աշխատում են փրկարարները, ոստիկանները, շտապ օգնության աշխատակիցները:
Նախարարությունում արդեն ձևավորվել է օպերատիվ խումբ, որը ուսումնասիրում է դեպքի մանրամասներն ու հետևանքները: Վթարի առնչությամբ նախարարությունում գործում է թեժ գիծ` 59-01-02, 59-01- 04, 59-01-05 հեռախոսահամարներով:
Հայաստանի արտակարգ իրավիճակների նախարարությունը (ԱԻՆ), իր հերթին, փոխանցում է, որ ըստ Ռուսաստանի ԱԻՆ ճգնաժամային կառավարման կենտրոնից ստացված տեղեկատվության՝ Վլադիկավկազ-Բեսլան շրջանցիկ ավտոճանապարհի 8-րդ կիլոմետրին «Մերսեդես Բենց-0404-15R» մակնիշի 50 AA 515 պետհամարանիշի մարդատար ավտոբուսը Մոսկվա-Երևան երթուղին իրականացնելիս բախվել է «Սկանիա» մակնիշի բեռնատար ավտոմեքենային:
Այս աղբյուրի փոխանցմամբ՝ ճանապարհատրանսպորտային պատահարի հետևանքով տուժել են 27 ուղևոր, որոնցից 5-ը մահացել են: Տուժածներից 22-ը, այդ թվում՝ 4 երեխա, անմիջապես հոսպիտալացվել են Վլադիկավկազ քաղաքի տարբեր հիվանդանոցներ: Ըստ տեղեկատվության՝ ավտոբուսում եղել է 52 ուղևոր:
Երկու գերատեսչությունները խոստանում են տրամադրել լրացուցիչ տեղեկատվություն:
