Մեր բանակը փառապանծ ճանապարհ է անցել. Սեյրան Օհանյան

seyran-ohanyanԶինված ուժերում ուսումնական նոր տարվա մեկնարկի կապակցությամբ ՀՀ պաշտպանության նախարար Սեյրան Օհանյանը խաղաղապահ բրիգադում մասնակցեց հանդիսավոր միտինգին:

 Ուսումնական մեկնարկի կապակցությամբ հանդիսավոր միտինգի ընթացքում ելույթ ունեցավ Հայաստանի խաղաղապահ բրիգադի հրամանատար Արթուր Սիմոնյանը: Նա ընդգծեց, որ Հայաստանը որդեգրել է միջազգային ինտեգրման միջոցով ազգային շահերը պաշտպանելու ռազմավարություն: «Հայաստանի Հանրապետությունն ակտիվորեն համագործակցում է համաշխարհային ուժային կենտրոնների և տարածաշրջանային գործընթացներում ներգրավված երկրների հետ, հանդես է գալիս որպես տարածաշրջանային համագործակցության միջավայրի ձևավորման, անվտանգության համակարգի ստեղծման, հարևան պետությունների միջև կառուցողական հարաբերությունների հաստատման գործոն: Այդ իսկ պատճառով, բացի սեփական պետության ինքնիշխանության պահպանումից, պետության համար պաշտպանական ոլորտի կառավարման կարևոր ուղղություն է հանդիսանում մասնակցությունը միջազգային խաղաղության ամրապնդմանը»,- «Արմենպրես»-ի հաղորդմամբ՝ ընդգծեց Սիմոնյանը:

Նա հավելեց, որ Հայաստանը՝ որպես ՄԱԿ-ի և միջազգային հանրության լիիրավ անդամ, պարտավորվել է իր մասնակցությունը ցուցաբերել համընդհանուր խաղաղության և անվտանգության ապահովման միջազգային ջանքերին: «Ուստի այդ ասպարեզում մենք ոչ միայն պետք է լինենք խաղաղության սպառող, այլ նաև դրանում լուրջ ներդրում ունեցող երկիր: 2004 թ. Հայաստանի խաղաղապահ բրիգադը խաղաղապահ առաքելություն է իրականացնում Կոսովոյում, 2006-2008 թթ. իրականացրել է  Իրաքում, 2010 թ. Աֆղանստանում, իսկ անցած տարվանից՝ Լիբանանում: Ընդհանուր առմամբ՝ խաղաղապահ առաքելություններին մեր զորամասից մասնակցել է մոտ 3 հազար զինծառայող: Մեկ տարվա ընթացքում կատարվում է մինչև 9-ը առաքելության հերթափոխ»,- նշեց Արթուր Սիմոնյանը:

ՀՀ պաշտպանության նախարար Սեյրան Օհանյանը, շնորհավորելով Զինված ուժերի անձնակազմին ուսումնական տարվա մեկնարկի կապակցությամբ, ընդգծեց, որ այս օրը բանակի բոլոր զորամասերում նշվում է հանդիսավոր միտինգներով: Նա շեշտեց, որ տարին առատ է լինելու մարտական պատրաստության տարբեր իրադարձություններով: «2016թ. պետք է լինի շարունակությունը մեր ամբողջ պատմությամբ եկած այն բարի ճանապարհի, որ հայկական բանակը կայացել, հզորացել է և այսօր ապահովում է իր զարգացումը: Այսպիսի հանդիսավոր միջոցառումների ժամանակ մենք հետադարձ հայացք ենք ձգում մեր անցած ճանապարհին և տեսնում ենք, որ մեր բանակը փառապանծ ճանապարհ է անցել: Կազմավորվելով մեզ պարտադրված պատերազմի ընթացքում՝ մենք կարողացել ենք ոչ միայն տարբեր մարտադաշտերում հաղթանակներ կերտել, այլ նաև զբաղվել զինծառայողների ուսուցմամբ, անհատական պատրաստությամբ, ստորաբաժանումների դաշտային վարժվածության աստիճանի բարձրացմամբ, որոնք էլ հիմք են հանդիսացել, որ մեր բոլոր կառույցները հաղթանակներ կերտեն տարբեր ռազմադաշտերում»,- ասաց նախարարը:

Սեյրան Օհանյանը հիշեց զորավար Անդրանիկի խոսքը. «Եթե դուք մտածում եք, որ մենք առանց զինավարժության և զենքին տիրապետելու կարող ենք հաղթանակներ կրել, ապա դա տղայական միամտություն է»: Նախարարի խոսքով՝ իրականության մեջ հենց այդպես էլ կա: «Ետպատերազմյան տարիներին մենք ամբողջությամբ լծվել ենք Զինված ուժերի կազմակերպչական մի շարք գործառույթների, որոնց հիմքում՝ բացի կազմհաստիքային կազմակերպչական միջոցառումներից, նաև ուսումնական և դաստիարակչական ողջ գործընթացն է: Այսօր Հայաստանի Հանրապետության Զինված ուժերը օրըստօրե բարձրացնու են իրենց կարողությունը»,- հավելեց  նախարարը:

Հանդիսավոր միտինգին մասնակցում էին նաև Հայաստանի տարբեր ուսումնական հաստատությունների՝ դպրոցների, բուհերի ներկայացուցիչներ, ովքեր իրենց խոսքում կարևորեցին բանակի և ուսումնական հաստատությունների համագործակցությունը: Միջացառումն ավարտվեց հանդիսավոր քայլերթով:

 


Այս թեմայով