Հոմոֆոբիայի, տրանսֆոբիայի, բիֆոբիայի դեմ պայքարի միջազգային օրվա կապակցությամբ LGBTnews-ը զրուցել է Pink Armenia հասարակական կազմակերպության նախագահ Նվարդ Մարգարյանի հետ։
֊ Նվա՛րդ, Հայաստանում կտրուկ փոխվել է հասարակական֊քաղաքական իրադրությունը, և IDAHOT֊ի այս օրն առիթ է՝ խոսելու այն մասին, թե ինչպիսի հեռանկարներ են բացվում նոր իրավիճակում ԼԳԲՏԻ մարդկանց իրավունքների իրացման առումով։
֊ Նախ նշեմ, որ Հայաստանում հասարակական-քաղաքական իրադրության փոփոխության վրա մեծապես ազդել են նաև ԼԳԲՏԻ մարդիկ, ովքեր պայքարի առաջին իսկ օրվանից եղել են առաջնագծում։ Այսինքն՝ կարող ենք փաստել, որ սիրո և համերաշխության հեղափոխության հաղթանակը նաև ԼԳԲՏԻ անձանց հաղթանակն է։ Ավելին՝ նոր կառավարության ներկայացուցիչներն իրենց ելույթներում բազմիցս անդրադարձել են մարդու իրավունքների պաշտպանության, սահմանադրական կարգի վերականգնման, օրենքի առջև բոլորի հավասարության և իրավունքի գերակայության սկզբունքների մասին, ինչը, իրավամբ, հնարավորություններ է բացում Հայաստանի բոլոր խոցելի խմբերի ներկայացուցիչների և նախորդ իշխանությունների կողմից ճնշված խմբերի համար՝ իրացնելու իրենց իրավունքները հավասար պայմաններում, քանզի յուրաքանչյուր ոք Հայաստանում պետք է երջանիկ լինի։
