Խե՞լքն ինչ են անում

xelqՏարեվերջին քաղծառայության խորհրդի ղեկավար Մանվել Բադալյանը դժգոհություն հայտնեց պետական պաշտոնների հավակնողների գիտելիքների մակարդակից և հայտարարեց. «Մենք կարող ենք մեր կողքին ունենալ բուհ ավարտած ուսանող, որը հավակնում է քաղաքացիական ծառայող դառնալու ու չգիտի` Հովհաննես Թումանյա՞նն է բանաստեղծը, թե Ալեքսանդր Թամանյանը, չգիտեն՝ ով է «Անլռելի զանգակատան» հեղինակը, իր հայրենիքին սահմանակից պետությունները: Եղել են դեպքեր, որ Հայաստանին սահմանակից պետություններից նշել են Ռումինիան: Անպայման քննությո՞ւն պետք է անցնի, որ սովորի, թե Սեպտեմբերի 21-ն ինչ օր է: Մենք ամուր փակելու ենք մեր դռները նրանց առջև: Նորմալ, կիրթ մարդկանցով համակարգն ապահովելը մեր առաջնային խնդիրներից է»: Իսկ Մանվել Բադալյանն արդյոք տեղյա՞կ է, որ իրենց դռները միշտ էլ բաց են անգամ այդպիսի «խելք» ունեցողների համար, եթե «թիկունք» ունեն: Տեղյա՞կ է, որ Թամանյանն էլ է դառնում բանաստեղծ, Հայաստանն էլ ոչ միայն Ռումինիային, այլև Աֆրիկային է սահմանակից, եթե համապատասխան մարդկանց մի քանի հազար դոլար է վճարվել: Արժե, որ Բադալյանը մի «քննություն» էլ իր կառույցի ներսում անցկացնի, գուցե հենց իրե՞նք են առաջին մեղավորները, որ պետական ապարատ են գործուղվում «ամենախելացիները»:

Իսկ որ ժամանակին հայտարարվել էր, թե «խելք պետք չէ քաղաքականությամբ զբաղվելու համար», արդեն հասկացել էինք ու տեսել. պետական ցանկացած պաշտոն զբաղեցնելու համար (եթե կան փող ու կապեր) գիտելիքի պակասն արդեն չգրված օրենք է դառնում,-գրում է Իրատես De facto թերթը:

Դիտվել է 28 անգամ
 


Այս թեմայով