Ժիրայր Սեֆիլյանը աղմկահարույց մանրամասներ ներկայացրեց․ «ռուսները որոշել են սպանել»

«Հիմնադիր խորհրդարանի» առաջնորդ Ժիրայր Սեֆիլյանը հայտարարում է, որ մինչև մեղադրյալի աթոռին հայտնվելը մի քանի անգամ սպառնալիքներ է ստացել, որ դադարեցնի քաղաքական գործունեությունը:

Դատավարության ավարտին ընդդիմադիր գործիչը աղմկահարույց մանրամասներ ներկայացրեց՝ պնդելով, որ բանը հասել է անգամ սպանության սպառնալիքին, ընդ որում ֆիզիկապես ոչնչացնել սպառնացել են Ռուսաստանի անունից, ռուսաստանցի ընդդիմադիր գործիչ Բորիս Նեմցովի սպանությունից ընդամենը երկու օր անց․ ֊ «Սպառնալիքը բառացի կերպով հնչել է այսպես. «Դադարեցրու քո քաղաքական գործունեությունը, ապա թե ոչ՝ ռուսները որոշել են սպանել քեզ»: Իմ պատասխանը եղել է. ֊ «Զեկուցեք Ձեր ղեկավարությանը, որ Հայաստանը տեր ունի և մենք գտնվում ենք մեր հողի վրա ու ազատ ենք մեր գործունեությամբ, իսկ դուք շուտով ռադներդ քաշելու եք մեր երկրից»:

Սեֆիլյանը գաղտանզերծում է, որ սպառնալիքը ստացել է «Հանուն ինքնիշխանության վերականգնման» նախաձեռնության անդամ Հայկ Նահապետյանից, ով հիշեցնենք, վերջին շրջանում ակտիվորեն մասնակցում է ընտանեկան բռնությունը կանխող օրինագծի դեմ ակցիաներին, իրավապաշտպանների գնահատմամբ՝ հիմնականում մերձռուսական կամ ռուսական կողմնորոշում ունեցող գործիչներն են դեմ դուրս եկել այս օրենքին:

«Հիմնադիր խորհրդարանի» առաջնորդի պաշտպանական ճառը ընթերցում էր փաստաբան Արայիկ Պապիկյանը, քանի որ դատավորն այսօր ևս թույլ չտվեց Սեֆիլյանին խոսել նստած՝ պահանջելով ոտքի կանգնել:

Այս թեմայով