Եթե ֆորսմաժորային իրավիճակ չլինի, յուրաքանչյուր քաղաքացի իր վրա զգալու է փոփոխություն

ԱԺ-Կառավարություն հարցուպատասխանի ժամին «Ելք» խմբակցության պատգամավոր Մանե Թանիլյանը մինչ հարց կուղղեր, մեջբերեց վարչապետ Կարեն Կարապետյանի վերջին հարցազրույցից մի հատված, որի ժամանակ նշել էր, թե ներկայիս կառավարման կոնֆիգուրացիայով հաջողություններ են գրանցել և շարունակում են նույն կերպ աշխատել: Ըստ նրա` միայն խոստումներ են տրվում, բայց չեն կատարվում:

Նա հարց ուղղեց վարչապետի պաշտոնակատար Կարեն Կարապետյանին. «Ինչքա՞ն աճ պետք է ունենա ՀՀ քաղաքացու կյանքի միջին տևողությունը, որպեսզի կարողանա տեսնել այս կանխատեսումների իրականացումը»:

Վարչապետ Կարապետյանը նշեց, որ իրենք 2017թ-ին 7,5% տնտեսական աճ են ապահովել, երեք ամիսներին էլ կհրապարակեն շուտով, որը կրկին առաջընթացիկ են:

«Այդ աճը ամենաբարձրն է բոլոր իմացած համեմատելի երկրների հետ՝ տարածաշրջան, ԵԱՏՄ, Իրան, Եվրոպա և այլն: Երբ ես խոսում եմ, որ կոնֆիգուրացիան ապացուցել է, և որոշակի հաջողություններ ենք գրանցել և մենք կանխատեսում ենք տնտեսական աճ, որը հիմք կտա երկար հորիզոնով ֆունդամենտալ բարեփոխումներ անել, ես իրականում հավատում եմ, և ավելին` համոզված եմ, որ այս մեկուկես տարում դա ցույց ենք տվել»,-ասաց նա:

Թե ինչքան տնտեսական աճ պետք է ապահովեն, որ յուրաքանչյուր քաղաքացուն հասնի, ըստ վարչապետի՝ հաշվարկելի թիվ է: «Բայց պետք է հաշվի առնել պոտենցիալը և տարածաշրջանը: Այս տարի 4,5% տնտեսական աճ ենք կանխատեսել։ Եթե ֆորսմաժորային իրավիճակ չլինի, կանխատեսում ենք դրանից բարձր թիվ և գալու ենք նրան, որ յուրաքանչյուր քաղաքացի իր վրա զգալու է: Իսկ ինչքա՞ն երկար ապրի, ինչքան երկար ապրի, այնքան լավ»,-ասաց նա:

Թանդիլյանը պնդեց` այն խոստումները, որոնք չեն կատարվել, դրանց թիվն անհամար է:

Վարչապետը շարունակեց. «Իրականում իմ կարծիքը ուզո՞ւմ եք լսել, որ 7.5% աճը բավարար է, որ մեր բոլոր խնդիրները լուծենք՝ ոչ, 100% տնտեսական աճը բավարա՞ր է, որ բոլոր խնդիրները լուծվել՝ ոչ, մեկ տարում հնարավո՞ր է բոլոր խնդիրները լուծել՝ ոչ: Հիմա եկեք մեզ գնահատեք, այսօրվա ստարտային պայմանների մեջ լա՞վ ենք արել, թե չէ: Յուրաքանչյուր հայ ուզում է իր կյանքի որակը փոխել, բայց յուրաքանչյուրի հերթը այդ տարի կարող է չհասնել, այդ պրոցեսն անընդհատ է»,-ասաց նա:

Այս թեմայով