Դեկտեմբերի 6-ին նախատեսված ՀԱՊԿ գագաթնաժողովը հետաձգվել է անդամ երկրների նախագահների որոշմամբ. ՀԱՊԿ գլխավոր քարտուղարի ԺՊ

Դա եղել է ՀԱՊԿ անդամ պետությունների ղեկավարների որոշումը: Այս մասին Tert.am-ի հետ զրույցում ասել է ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը՝ խոսելով այն մասին, թե ում նախաձեռնությամբ է հետաձգվել դեկտեմբերի 6-ին նախատեսված նիստը:

«Ես լիազորված չեմ մեկնաբանելու ՀԱՊԿ անդամ պետությունների ղեկավարների որոշումը: Դա եղել է ՀԱՊԿ անդամ երկրների նախագահների որոշումը: Դա նախագահների լիազորությունն է»,- ասաց Վ. Սեմերիկովը:

Հարցին՝ ո՞վ է եղել նիստը հետաձգելու նախաձեռնողը, նա կրկնեց, որ որոշումը կայացնում են ՀԱՊԿ անդամ-երկրները: «Ես չունեմ տեղեկություն»,- նշեց նա:

Հիշեցնենք, որ վարչապետի պաշտոնակատար Նիկոլ Փաշինյանի խոսնակ Արման Եղոյանն ավելի վաղ հայտարարել էր, որ Հայաստանը հանդես չի եկել ՀԱՊԿ գագաթաժողովը հետաձգելու առաջարկով։ Անձամբ Նիկոլ Փաշինյանը լրագրողներին ասել էր, որ ՌԴ նախագահ Վլադիմիր Պուտինի հետ հեռախոսազրույցի ընթացքում իրեն առաջարկվել էր հետաձգել դեկտեմբերի 6-ի նիստը, ինքն էլ համաձայնել էր:

Այնինչ, Ռուսաստանի նախագահ Վլադիմիր Պուտինի օգնական Յուրի Ուշակովը հայտարարել էր, թե դեկտեմբերի 6-ին նախատեսված ՀԱՊԿ գագաթնաժողովը հետաձգվել է Հայաստանի խնդրանքով:

 

Այս թեմայով