Արցախում երկնիշ տնտեսական աճ է ակնկալվում. Արայիկ Հարությունյան

Առաջիկա օրերին Արցախում կսկսվի համատարած բերքահավաքը: Արցախի Հանրապետության կառավարությունն անցած տարիների համեմատ, նախատեսում է ավելացնել ցորենի, գարու, եգիպտացորենի մշակումը և այլն:

«Գոհ ենք ընդհանուր առմամբ, և ընդհանուր գյուղատնտեսական նախագծերն ունեն իրենց գնողներն արդեն: Տնտեսական առումով, իհարկե, մենք խնդիրներ ունեցանք, բավականին շատ ներդրողներ հետաձգեցին իրենց գործունեությունը, բայց բարեբախտաբար, նաև ունենք ներդրողների մի մեծ բանակ, որը ոչ միայն չի դադարեցրել, այլև նախորդ տարվա ապրիլյան օրերին շարունակում էին կատարել իրենց ներդրումները: Ընդամենը՝ մեկ-երկու օր եղավ, որ աշխատանքները կանգնեցին, այն էլ՝ ավելի շատ մարդկային ռեսուրսների պատճառով, որովհետև աշխատող հիմնական զանգվածը գտնվում էր առաջնագծում»,-«Արմենպրես»-ի հաղորդմամբ՝  լրագրողների հետ հանդիպման ժամանակ ասել է Արցախի Հանրապետության վարչապետ Արայիկ Հարությունյանը:

ԱՀ վարչապետի խոսքով՝ տնտեսական աճը տարեցտարի ավելանում է, և այս տարի սպասում են երկնիշ թիվ, որովհետև 2016 թվականի վերջին շահագործվել են բավական թվով ՀԷԿ-եր, ինչի արդյունքում իրենք դարձել են մի երկիր, որը սեփական պահանջից ավելի էլեկտրաէներգիա է արտադրում, և արդեն կարող է առավել արդյունավետ աշխատել Հայաստանի հետ: Հարությունյանը նշեց, որ հիմնական ներդրումները եղել են երկու նախագծերում` հիդրոէներգետիկայի և հանքարդյունաբերության:

«2017 թվականի առաջին հինգ ամսվա արդյունքներով կարող ենք ասել, որ բարեգործական, պետական և այլ ծրագրերի հաշվին ավելացրել ենք շինարարության ծավալները: Ինչպես նաև զարգանում է ձկնաբուծությունը»,- ասել էԱՀ վարչապետը:

Դիտվել է 20 անգամ
 


Այս թեմայով