Home » ՄԱՄՈՒԼ » Արդարադատության ակադեմիայի ռեկտորի պաշտոնի երեք թեկնածուները. «Հրապարակ»

Արդարադատության ակադեմիայի ռեկտորի պաշտոնի երեք թեկնածուները. «Հրապարակ»

56035«Հրապարակ» օրաթերթը գրում է. «Արդարադատության ակադեմիայի ռեկտորի պաշտոնի թեկնածուները երեքն են. Սերգեյ Առաքելյանը ՀՔԾ պետ Վահրամ Շահինյանի խորհրդականն է, նաեւ դասավանդում է ԵՊՀ-ում, իրավագիտության դոկտոր է: Նա հարուստ կենսագրություն եւ գիտելիքներ ունի, սակայն բացարձակապես չունի վարչական աշխատանքի փորձ․ ողջ կյանքում եղել է կատարող: Մյուս թեկնածուն՝ Սարգիս Թորոսյանը, աշխատում է ՀՀ նախագահի աշխատակազմի իրավաբանական վարչությունում, որի ղեկավարն արդարադատության նախկին փոխնախարար Գրիգոր Մուրադյանն է: Նա համարվում է ԱԺ աշխատակազմի ղեկավար Հրայր Թովմասյանի եւ Գրիգոր Մուրադյանի մարդը: Ի դեպ, նա հնարավոր է նշանակվի կառավարության աշխատակազմի պետաիրավական վարչության պետ․ այդ պաշտոնը թափուր է մնացել Արտակ Ասատրյանի՝ արդարադատության նախարարի տեղակալ նշանակվելուց հետո:

Մրցույթին մասնակցելու համար դիմել է նաեւ ՀՀ գլխավոր դատախազության իրավական ապահովման եւ եվրաինտեգրման բաժնի նախկին պետ Թամարա Շաքարյանը։ Այս բաժինը կառուցվածքային փոփոխությունների հետեւանքով վերացվեց։ Թեեւ լուրեր են պտտվում, որ Գեւորգ Կոստանյանը Թամար Շաքարյանին ազատել է ոչ թե կառուցվածքային բարեփոխման, այլ ավտոմեքենան սխալ կայանելու համար։ Շաքարյանն այժմ դասավանդում է: Նրա` մրցույթում անցնելու շանսերը շատ բարձր չեն գնահատվում: Առավել հավանական թեկնածու է համարվում Սերգեյ Առաքելյանը: Ասում են՝ Սարգիս Թորոսյանի մասնակցությունը մրցույթին կշիռ, թեժ պայքարի իմաստ հաղորդելու եւ հանրությանը ներկայանալու նպատակ ունի: Նշենք, որ Արդարադատության ակադեմիայի ռեկտորի պաշտոնը թափուր է մնացել Ռուբեն Մելիքյանի՝ ԼՂՀ օմբուդսմեն նշանակվելուց հետո։ Մրցույթը կայանալու է հունիսի 28-ին։ Մինչ առաջադրումը շրջանառվում էին այլ անուններ եւս, օրինակ` ԵՊՀ իրավաբանության ֆակուլտետի դեկան Գագիկ Ղազինյանի որդու՝ ԵՊՀ Եվրոպական ուսումնասիրությունների կենտրոնի տնօրեն Արթուր Ղազինյանի թեկնածությունը: Ինչ վերաբերում է վճռաբեկ դատարանի քրեական եւ զինվորական պալատի նախագահ Դավիթ Ավետիսյանին, ապա նրա՝ մրցույթին չմասնակցելու պատճառը կենսաթոշակային տարիքն է»:

Ավելի մանրամասն՝ թերթի այսօրվա համարում:

Դիտվել է 88 անգամ
Untitled-1 copy - Copy - Copy